ສຶກສາອົບຮົມຜູ້ປະກອບການຮ້ານອິນເຕີເນັດກາເຟ ຢູ່ເມືອງວັງວຽງ

ໃນ​ຕອນ​ບ່າຍ ຂອງວັນ​ທີ 20 ກຸມ​ພາ 2020 ຜ່ານ​ມານີ້ ຢູ່​ທີ່ກອງ​ບັນ​ຊາ​ການ ປກ​ສ ເມືອງວັງ​ວຽງ ຄະນະກຳມະການສະເພາະກິດລົງຕິດຕາມກວດກາແກ້ໄຂການໃຫ້ບໍລິການອິນເຕີເນັດກາເຟປະກອບມີ ພະ​ແນກ​ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ ແຂວງວຽງ​ຈັນ​ ໄດ້​ລົງ​ໄປ​ສົມ​ທົບ​ກັບ​ຫ້ອງ​ການ​ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ​ເມືອງ ແລະ ກອງ​ບ​ັນ​ຊາ​ການ ປກ​ສ ເມືອງວັງ​ວຽງ ​ຮຽກ​ຕົວ​ຜູ້​ປະ​ກອບ​ການ​ຜູ້​ເປັນ​ເຈົ້າ​ຂອງ​ຮ້ານ​ອິນ​ເຕີ​ເນັດ​ກາ​ເຟ ປະ​ເພດ I ຊື່: ນາງ ຟາງກວາງ​ມິງ ຄົນ​ຫວຽດ​ນາມ​ພ້ອມ​ດ້ວຍ​ທີມ​ງານ​ມາ​ສຶກ​ສາ​ອົບ​ຮົມ ເຊີ່ງ​ຜູ້​ກ່ຽວ​ໄດ້​ມາ​ເປີດ​ບໍ​ລິ​ການ​ຮ້ານ​ອິນ​ເຕີ​ເນັດ​ກາ​ເຟ​ ປະ​ເພດ I ຂຶ້ນ​ຢູ່​ທີ່​ເມືອງວັງ​ວຽງ ໂດຍ​ອາ​ໄສ​ຄົນ​ລາວ​ຢູ່​ພາຍ​ໃນ​ເມືອງ​ອອກ​ຊື່​ເປັນ​ເຈົ້າ​ຂອງ​ທຸ​ລະ​ກິດ ແລະ ນາຍ​ໜ້າ​ໃຫ້​ ເຊີ່ງ​ລວມ​ທັງ​ໝົດ​ມີ 3 ຮ້ານ (ຮ້ານອິນເຕີເນັດຄິງສະຕາ) ທີ່​ໄດ້​ເຄື່ອນ​ໄຫວ​ແບບ​ບໍ່​ຖືກ​ຕ້ອງ ໂດຍ​ບໍ່​ໄດ້​ຮັບ​ອະ​ນຸ​ຍາດ​ຈາກ​ຂະ​ແໜງ​ການ​ທີ່​ກ່ຽວ​ຂ້ອງ, ເປີດໃຫ້​ບໍ​ລິ​ການຫຼີ້ນ​ເກມ​ອອນ​ລາຍ​ ແລະ ການພະນັນອອນລາຍໂດຍ​ສະ​ເພາະ ທີ່​ມີ​ລັກ​ສະ​ນະ​ມົ້ວ​ສຸມ, ບໍ່​ມີ​ໂມງ​ເວ​ລາ, ສົ່ງ​ສຽງ​ດັງ​ລົບ​ກວນ​ເຮືອນ​ໃກ້​ຄຽງ ແລະ ສ້າງ​ຄວາມ​ສັບ​ສົນ​ໃຫ້​ແກ່​ສັງ​ຄົມ ເຊີ່ງ​ເຄີຍ​ຖືກ​ປັບ​ໃໝ ແລະ ສຶກ​ສາ​ອົ​ບ​ຮົມ​ມາ​ 1 ຄັ້ງ​ແລ້ວ.

ໃນ​ການ​ສຶກ​ສາ​ອົ​ບ​ຮົມ​ຄັ້ງ​ນີ້​ພະ​ແນກ​ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ ແຂວງວຽງ​ຈັນ ແລະ ຫ້ອງ​ການ ປ​ທ​ສ ເມືອງ ໄດ້​ນຳ​ເອົາ​ແຈ້ງ​ການ ເລກ​ທີ 2253/ຫ​ສນຍ, ລົງ​ວັນ​ທີ 25 ທັນ​ວາ 2019 ຂອງ​ຫ້ອງວ່າ​ການ​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ ວ່າ​ດ້ວຍ​ການ​ຊີ້​ນຳ​ກ່ຽວ​ກັບ​ສ​ະ​ພາບ​ການຫຼີ້ນ​ຫວຍ​ເຖື່ອນ, ຕູ້​ເກມ​ສ​ລັອດ (Slot Machine), ເກມ​ອອນ​ລາຍ ແລະ ທຸ​ລະ​ກິດ​ຕ່າງໆ ທີ່​ຜິດ​ກົດ​ໝາຍ, ແຈ້ງ​ການສະເໜີ ​ເລກ​ທີ 118/ຫກ​ຊ.ກ​ຕ​ຂ ລົງວັນທີ 20 ມັງກອນ 2020 ຂອງ​ຫ້ອງ​ການ​ກະ​ຊວງ ປ​ທ​ສ ວ່າ​ດ້ວຍ​ການ​ໂຈະ​ການ​ອອກ​ອະ​ນຸ​ຍາດ ແລະ ຕິດ​ຕາມກວດ​ກາ​ການ​ເຄື່ອນ​ໄຫວ​ຂອງ​ຮ້ານ​ອິນ​ເຕີ​ເນັດ​ ແລະ ຂໍ້​ຕົກ​ລົງຂອງກະຊວງ ປທສ ສະເໜີ ເລກ​ທີ 828/ປ​ທ​ສ, ລົງວັນທີ 11 ມີນາ 2015 ວ່າ​ດ້ວຍ ການ​ໃຫ້​ບໍ​ລິ​ການ​ອິນ​ເຕີ​ເນັດ​ກາ​ເຟ ເພື່ອ​ໃຫ້​ຜູ້​ເຂົ້​າ​ຮັບ​ການ​ສຶກ​ສາ​ອົ​ບ​ຮົມ​ໄດ້​ຮັບ​ຮູ້ ແລະ ເຂົ້າ​ໃຈ ເພື່ອ​ນຳ​ໄປ​ຈັດ​ຕັ້ງ​ປະ​ຕິ​ບັດ, ໂດຍ​ໄດ້​ສ້າງ​ເປັນ​ບົດ​ບັນ​ທຶກ​ໄວ້ເປັນບ່ອນອີງຖ້າ​ມີ​ການ​ສືບ​ຕໍ່​ຝ່າຝືນ​ຄັ້ງ​ຕໍ່​ໄປ​ຈະ​ໄດ້​ດຳ​ເນີ​ນ​ຄະ​ດີ​ຕາມ​ລະ​ບຽບ​ກົດ​ໝາຍ​ບ້ານ​ເມືອງ ພ້ອມທັງຖອນໃບອະນຸຍາດ ແລະ ຢຶດ​ອຸ​ປະ​ກອນ​ທັງ​ໝົດ​ເປັນ​ຂອງ​ລັດ.